पहिली सुसज्ज अत्याधुनिक ए.एल.एस रुग्णवाहिका पांढुरंग चरणी सुपूर्द

पंढरपूर ( प्रतिनिधी ) – राज्याचे नगरविकास मंत्री एकनाथ शिंदे यांच्या संकल्पनेतुन आणि खासदार डॉ. श्रीकांत शिंदे फाउंडेशनच्या माध्यमातून संपूर्ण महाराष्ट्रात सुरू असलेला शिव आरोग्य सेवेसाठी रुग्णवाहिका लोकार्पण उपक्रम यापुढेही अखंडितपणे सुरू ठेवा अशा शुभेच्छा शिवसेनेचे पक्षप्रमुख तथा मुख्यमंत्री उद्धव ठाकरे यांनी शिवसेना वैद्यकीय मदत कक्षाचे कक्ष प्रमुख मंगेश चिवटे यांना दिल्या.

आषाढी एकादशीच्या निमित्ताने मुख्यमंत्री उद्धव ठाकरे यांच्या शुभहस्ते अत्याधुनिक ए.एल.एस. रुग्णवाहिकेची चावी श्री विठ्ठल रुक्मिणी मंदिरे समितीचे सह अध्यक्ष ह.भ.प. गहिनीनाथ औसेकर महाराज यांच्याकडे सुपूर्द करण्यात आली. यावेळी रश्मी (ताई) ठाकरे, युवा सेना प्रमुख तथा राज्याचे पर्यावरण तथा पर्यटन मंत्री आदित्य ठाकरे, शिवसेनेचे सचिव मिलिंद नार्वेकर, शिवसेना वैद्यकीय मदत कक्षाचे कक्ष प्रमुख मंगेश चिवटे, श्री विठ्ठल-रुक्मिणी मंदिरे समितीचे मुख्य कार्यकारी अधिकारी विठ्ठल जोशी, समिती सदस्य संभाजी राजे शिंदे आदी जण उपस्थित होते.

यावेळी मंदिर समितीचे सह अध्यक्ष श्री ह.भ.प गहिनीनाथ महाराज औसेकर म्हणाले की, श्री विठ्ठल रुक्मिणी मंदिरे समितीला एक अत्याधुनिक रुग्णवाहिका देण्यात यावी अशी मागणी आम्ही डॉ. श्रीकांत शिंदे फौंडेशनकडे केली होती. आज आषाढी एकादशीच्या शुभ मुहूर्तावर मुख्यमंत्री उद्धव ठाकरे यांच्या शुभहस्ते आमच्या ताब्यात ही रुग्णवाहिका मिळत असल्याचा विशेष आनंद होत आहे. सदर रुग्णवाहिका पंढरपूर परिसरातील गरजू रुग्णांना आधार ठरेल असा विश्वास औसेकर महाराज यांनी व्यक्त केला. तर समितीचे मुख्य कार्यकारी अधिकारी विठ्ठल जोशी यांनी रुग्णवाहिका दिल्याबद्दल डॉ. श्रीकांत शिंदे फौंडेशनचे सर्वेसर्वा आणि कल्याणचे खासदार डॉ. श्रीकांत शिंदे यांचे आभार मानले.

यावेळी, खासदार डॉ. श्रीकांत शिंदे आणि शिवसेना वैद्यकीय मदत कक्ष प्रमुख मंगेश चिवटे यांनी संयुक्तपणे संपादित केलेल्या वैद्यकीय मदत मार्गदर्शक या ग्रंथाच्या प्रति मुख्यमंत्री यांच्यासहित उपस्थित सर्व मान्यवरांना भेट देण्यात आल्या.