शासकीय कार्यालयात अधिकारी व कर्मचाऱ्यांनी मोबाईल वापराचे नियम जाहीर, काय आहेत नियम वाचा सविस्तर
मुंबई. (विशेष प्रतिनिधी) – शासकीय कार्यालयांमध्ये अधिकारी / वापराबाबतच्या शिष्टाचाराबाबत महाराष्ट्र शासन सामान्य प्रशासन विभागाचे सचिव इंद्रा मालो यांनी राज्यपालांच्या मान्येते जाहीर केला आहे.
या परिपत्रकात असे म्हटले आहे की, अलिकडील काळात सुलभ व वेगवान संपर्क माध्यम म्हणून शासकीय कामकाजात भ्रमणध्वनीचा (Mobile / Cell Phone) वापर अपरिहार्य बनला आहे. तथापि असे निदर्शनास आले आहे की, भ्रमणध्वनीच्या वापराबाबत काही वेळा संबंधित अधिकारी / कर्मचारी यांचेकडून अपेक्षित शिष्टाचार पाळण्यात येत नाहीत. अशा प्रकारच्या वर्तणुकीमुळे शासनाची प्रतिमा काही प्रमाणात मलीन होते. सबब शासकीय कामकाज करताना भ्रमणध्वनीच्या वापराबाबत पाळावयाच्या शिष्टाचाराबाबत पुढील प्रमाणे सूचना देण्यात येत आहेत. १. कार्यालयीन कामासाठी दूरध्वनीचा वापर करताना प्राथम्याने कार्यालयातील दूरध्वनीचा (Landline) वापर करावा. २. कार्यालयीन वेळेत कार्यालयीन कामासाठी आवश्यक असेल तेव्हा च भ्रमणध्वनीचा वापर करावा. ३. भ्रमणध्वनीवर बोलताना सौजन्यपूर्ण भाषेचा वापर करावा. तसेच बोलताना इतरांच्या उपस्थितीची जाणीव ठेवावी. ४. भ्रमणध्वनीवर बोलताना सौम्य आवाजात बोलावे, बोलताना वाद घालू नये तसेच असंसदीय भाषेचा वापर करू नये. ५. कार्यालयीन कामासाठी भ्रमणध्वनीचा वापर करताना लघुसंदेशाचा (Text Message) शक्यतो वापर करावा. तसेच मोबाईल फोनवर बोलताना कमीत कमी वेळेत संवाद साधावा. ६. भ्रमणध्वनी व्यस्त असताना प्राप्त लोकप्रतिनिधी / वरिष्ठ अधिकाऱ्यांच्या कार्यालयीन कॉल्सना तात्काळ उत्तर द्यावे. ७. भ्रमणध्वनीवर कार्यालयीन कामकाजासाठी समाज माध्यमांचा वापर करताना वेळेचे व भाषेचे तारतम्य बाळगावे. ८. अत्यावश्यक वैयक्तिक दूरध्वनी, कक्षाचे बाहेर जाऊन घ्यावेत. ९. वरिष्ठ अधिकाऱ्यांच्या कक्षात / बैठकीदरम्यान असताना आपला भ्रमणध्वनी silent / vibrate mode वर ठेवावा. १०. वरिष्ठ अधिकाऱ्यांच्या कक्षात / बैठकी दरम्यान भ्रमणध्वनी तपासणे, संदेश तपासणे, ear piece / ear phone वापरणे अशा बाबी टाळाव्यात. ११. कार्यालयीन कामकाजासाठी दौऱ्यावर असताना भ्रमणध्वनी बंद ठेवण्यात येऊ नये. असे महाराष्ट्र शासनाच्या सामान्य प्रशासन विभागाच्या “प्रशासकीय सुधारणा, रचना व कार्यपध्दती” कडून सदरचे शासन परिपत्रक हे राज्यपाल यांच्या आदेशानुसार व त्यांच्या नांवाने प्र.सु.र. व का. विभाग सचिव इंद्रा मालो यांनी जाहीर केला आहे.
