देशभरातील पेट्रोल पंप बंद राहणार !

दिल्ली. (प्रतिनिधी) – आंतराष्ट्रीय बाजारपेठेत कच्च्या तेलाच्या किंमतीत होणाऱ्या चढ उतारानुसार दररोज पेट्रोल-डिझेलचे दर बदलण्याचा निर्णय केंद्र सरकारने घेतला आहे. या निर्णयाविरोधात फेडरेशन ऑफ ऑल इंडिया पेट्रोलियम डीलर्सने येत्या १६ ते २४ जून या कालावधीत देशातील सर्व पंपांवर पेट्रोल व डिझेलची खरेदी – विक्री बंद ठेवण्याचा निर्णय घेतला असून या आंदोलनानंतरही केंद्राने निर्णय मागे न घेतल्यास २४ जून नंतर बेमुदत बंदचा इशाराही दिला आहे.

फेडरेशनने केंद्रीय पेट्रोलियम मंत्री धर्मेंद्र प्रधान यांच्याकडे निवेदन सादर करून पेट्रोल-डिझेलचे दर दररोज बदलण्याचा निर्णय मागे घेण्याची मागणी केली आहे. केंद्र सरकारच्या या निर्णयामुळे देशातील पेट्रोल डिलर्सचे मोठ्या प्रमाणात नुकसान होणार आहे. हा निर्णय जनतेच्याही फायद्याचा नाही. त्यामुळे तो त्वरित मागे घ्यावा, अन्यथा बंद पुकारू, असा इशारा दिला असल्याची माहिती फेडरेशनचे अध्यक्ष अशोक बधवार आणि उपाध्यक्ष बाबा” धुमाळ यांनी दिली.

दररोज एक टँकर पेट्रोल आणि डिझेलची विक्री होत असलेल्या पंपांवर या निर्णयाचा जास्त परिणाम होणार नाही. अशा पंपांची संख्या कमी आहे. अनेक पंपांवर विशेषतः ग्रामीण भागात एका टँकरची पेट्रोल विक्री होण्यास कमीत कमी तीन ते चार दिवस लागतात. या परिस्थितीत दररोज पेट्रोलच्या किंमतीमध्ये बदल झाल्यास पंपचालकांचे मोठे नुकसान होणार आहे. हा निर्णय घेताना पंपचालकांच्या होणाऱ्या नुकसान भरपाईचा विचार केलेला नाही. त्यामुळे या निर्णयाचा विरोध म्हणून पेट्रोल खरेदी-विक्री बंद करण्याचा निर्णय घेतला आहे, असं धुमाळ म्हणाले.

पेट्रोल-डिझेल सरकारी नियंत्रणातून मुक्त केल्यानंतर वर्षांतून दोन वेळा इंधनाचे दर बदलले जात होते. त्यानंतर भाजपप्रणित केंद्र सरकराने महिन्यातून दोन वेळा या दरात बदल करण्यास सुरुवात केली. आता दररोज पेट्रोलचे दर बदलण्याचा निर्णय घेतला आहे. या निर्णयाचा सर्वाधिक फटका ग्रामीण भागातील पेट्रोल पंपचालक आणि नागरिकांना बसणार आहे, असे अशोक बधवार यांनी सांगितले.